مصريون يسخرون من حزب السيسي بعد مسيرة "خليك بالبيت" في شوارع قنا

نظّم حزب "مستقبل وطن"، الذي يعتبره المصريون، الظهير السياسي للرئيس عبد الفتاح السيسي، مسيرة في محافظة قنا تحت عنوان "خليك في بيتك" لمحاربة فيروس كورونا، بحضور وكيل وزارة الصحة، تداول على أثرها رواد مواقع التواصل الاجتماعي، صوراً للمسيرة مصحوبة بالسخرية والاستهجان نظراً لخطورة التجمعات.

‏‎كتبت كليوباترا: "في حزب اسمه مستقبل وطن عامل مسيرة اسمها (خليك في بيتك)، البيه النائب بتاع مستقبل وطن حتى المرض استغلتوه عشان الانتخابات قربت، يعني حضرتك جيت تكحلها عمتها، ده اسمه دمار وطن. يا حضرة النائب لما تبص لمصلحتك فقط وتحشد في وقت خطر، يا أخي ربنا ينتقم منكم"٠

وكتبت توتا: ‏"حزب مستقبل وطن عمل تجمع عشان يوعي الناس لخطر التجمع"، وشارك عبد الجليل: ‏"شغلت مخك يا معلم، حزب مستقبل وطن بقنا، عامل حملة توعية ضد التجمعات، هي دي النكتة فعلاً في عالم الجهلاء".

وسخر عاصم البرادعي: ‏"حزب مستقبل وطن، نشكركم على حسن تعاونكم معنا في انتشار الفيروس". 

وشارك كمال الشريف: ‏"‎#صورة_وتعليق: يا مثبت العقل في الدين: الصورة اللي على اليمين سببها حزب مستقبل وطن علشان محاربة فيرس كورونا!!! والصورة اللي على الشمال نائب محافظ قنا والسيد وكيل وزارة الصحة بقنا!!! حد يناولني لطامه الطم بيها واللي يعرف يلطم يجي يلطم معايا".

وتساءلت سارة: "‏حزب مستقبل وطن الجميل ينظم مسيرة تحت شعار إقعد في بيتك، لما دول المثقفين يبقى باقي الشعب إيه؟، بجد الحزب ده فيه كمية عك مش طبيعية". 

وعلى عهدة الصقر الجارح: ‏‎"نائب اسمه أشرف رشاد عن حزب مستقبل وطن، اليوم في ميدان الساعة بمحافظة قنا، نظم مسيرة واضح إنها جزء من حملته الانتخابية، وكانت حجته عمل كشوفات مجانية ضغط وسكر للناس، فتجمع عليه المئات.. وفي الصور رسالة من أحد الأطباء اللي الصحة أجبرتهم عالمشاركة في التنظيم ده مش عمل".

المسيرة اعترض عليها حتى مؤيدو النظام كما علق محمد منصور: "لما ناس بسيطة ومش فاهمه تغلط يبقى واجب علينا نفهمهم ونوعيهم، إنما حزب كبير زي حزب مستقبل وطن يقوم بكارثة زي دي، يبقى الموضوع مشكوك فيه وما يعديش بالساهل، كده إحراج علني للدولة وقياداتها، وبيهدموا كل اللي الرئيس بيعمله ولو الخبر ده صحيح، لازم يتحاسبو على العته ده".