مرتضى منصور: "وزير الرياضة كان بيضحك والسيسي بيتشتم"

وأضاف منصور غاضباً: "بقول لجماهير الزمالك إن الراجل ده (الوزير) دمر النادي، وإحنا مش هانستنى ليوم جمعية عمومية عشان نستقيل.. إحنا هانمشي من دلوقتي، وسايبين له اللجنة بتاعته.. ينفع نادي في خزينته 200 مليون جنيه، وكل يوم يروح يقول لعيل موظف في وزارة الشباب (مالوش لازمة) من فضلك إديني مصروفي".

وتابع: "دي نتيجة متوقعة، وأي حد هايكلمني بعد كده في الدولة دي، ويقولي هدي ياستاذ مرتضى، هاقوله مابهديش.. هدوا أنتوا شوية، لأن الوزير عاوزنا شوية طراطير، والأيام هاتثبت لك يا خالد إن أنا مش طرطور.. أنت بتهد الزمالك عشان الأهلي، ودي أول نتائج لجنتك.. وأنت ماحضرتش الماتش النهارده رغم إني دعيت علناً".

وزاد منصور: "عاوز حد يرد عليا من الدولة، لأن الحساب هايبقى عسير.. الكرسي اللي قاعد عليه الوزير ياما ناس قعدت عليه ومشيت، بس فضل الزمالك.. وبقول له أنت احترمت النادي الأهلي، وروحت الماتش بتاعه في أفريقيا، وكنت فرحان، وضحكتك من الودن للودن، وأنت شايف رئيس محترم اسمه السيسي بيتشتم، هو وجيشه والشرطة".