السيسي في عيد العمال... ومغردون: "احتفل بالعامل الصيني إنتاجه مغرق مصر"

ألقى الرئيس المصري، عبدالفتاح السيسي، كلمة أثناء الاحتفال بعيد العمال، وكانت كالعادة تصريحاته مادة مثيرة لاهتمام رواد مواقع التواصل الاجتماعي.

وتحدث السيسي عن فترته الرئاسية الماضية: "مهمتي خلال الأربع سنوات الماضية تثبيت أركان الدولة"، ليعلق محمد عادل الناشط وعضو جماعة "6 إبريل": "البقاء لله في الدولة".

وأضافت أميرة: "#السيسي: مهمتي خلال الأربع سنوات الماضية تثبيت أركان الدولة... أصل الأركان بقت بعافية شوية بعد ما غرقت في السيول".

وتساءل كامل عمر: "كنت أحب أن أعرف في مناسبة عيد العمال كم مصنع جديد تم إقامته أو مصنع قديم تم إعادته!".

وعلق محمد مطاوع بصورة عن تكريم القيادات العمالية: "هم دول العمال اللي مفروض نقف لهم احتراما لهم واللي المفروض يتكرّموا في عيد العمال مش أصحاب المكاتب اللي قاعدين في المكيفات والأكل بيجي لحد عندهم، دول اللي هم بينضفونا عشان شكلنا يكون حلو قدام العالم، دول اللي ميعرفوش الرشوه ولا بيظلمو دول المظلومين المطحونين".

وفي نفس السياق كتب عبدالرحمن عارف: "في #عيد_العمال هم أكثر الناس ظلماً، وخصوصاً الفلاح هو من يدفع فتورة الغلاء والاقتصاد، وهو من يتحمّل غلاء الأسعار ويبني مصر من أجره المتهالك... وهناك من يعيش في أفضل الأماكن في مصر ويطلع ع الشاشة ببدلة ثمنها لمن استطاع إليه سبيلا ويقولك اصبروا... حسبنا الله".

وعن واقع العامل الحقيقي كتب أحد المغردين: "وهو لسه في عمال في مصر علشان يكون لهم عيد، الحمد لله وصلتوهم إنهم يكونوا في صفوف المتسوّلين أو العاملين في مهنتين وتلاتة علشان يقدر يوفر لأولاده لقمة العيش إلا إذا كنتم تقصدوا عمال مدينة الإنتاج الإعلامي".

كما ختم السيسي بالقول إن: "اللي هيحافظ على مصر شعب مصر"، ليوجّه له سامي عزام الشكر: "إضافة عظيمة أوي يا بلحة نوّرت المحكمة".

ويضيف رامي محروس: "في نهاية كلمة السيسي بمناسبة #عيد_العمال بيقول اللي هيحافظ على البلد أبنائها وشعبها... فعلا لما تسترد منكم ومن الحاشية اللي واكلة خيرها وبيرموا لشعبها الفتافيت حفظ الله #مصر منكم".

وفي تصريح آخر خاطب فيه السيسي العمال: "هاتتعبوا معايا أكتر"، ليفسّر علي: "الجينرال لـ"العمال": (هتتعبوا معايا أكتر)... وده معناه إن فيه صبّ شديد جدا جاي فا اربطوا الحزام لا شدوا الحزام جدااا.. الناس مش لسه هتتعب الناس جابت آخرها يا عم".

ومستفسراً كتب "ناشط مش سياسي": "السيسي: هاتتعبوا معايا أكتر... من ساعة ما جيت وانت بتقولنا هتتعبوا معايا، معلش أومّال هنرتاح إمتى".

ولخص مصطفى شيمي الواقع بمطالبة: "أنا رأيي نحتفل بالعمال الصينيين اللي إنتاجهم مغرق مصر".